Milli Qəhrəman Namiq Abdullayevin xatirəsi anıldı

Azərbaycanın Milli Qəhrəmanı şəhid Namiq Abdullayevin xatirəsi igid döyüşçünün adını daşıyan Ağcabədi rayonunun Avşar kənd tam orta məktəbində anılıb. Ağcabədi rayon İcra Hakimiyyətinin nümayəndəsi, kənd ziyalıları,şəhidin yaxın qohumlarının iştirakı ilə karantin qaydalarına uyğun şəkildə həyata keçirilən mərasimdə Milli Qəhrəmanın büstü önünə tər qərənfillər düzülüb.


Çıxış edənlər N.Abdullayevin mənalı həyat və qəhrəmanlıqla dolu döyüş yolundan danışıblar. Məlumat verilib ki, Abdullayev Namiq Vahid oğlu 10 may 1974-cü ildə Ağcabədi rayonunun Avşar kəndində anadan olub. 1991-ci ildə Avşar kənd orta məktəbini bitirib. Namiq 1992-ci ilin dekabr ayında cəbhəyə yola düşür. 1993-cü il 9 fevralda erməni silahlı dəstələri Xocavənd rayonunda mövqe tutmuş döyüşçülərimizin üzərinə böyük qüvvə ilə hücuma keçirlər, düşmənin güclü hərbi texnikası qarşısında bu kiçik dəstəmiz tab gətirə bilməzdi. Amma onlar ölümün gözünə dik baxdılar və hücumu dəf etməyə çalışdılar. N.Abdullayev bu döyüşdə xüsusilə fərqlənir. Onlarla erməni quldurunu məhv edən Namiq son anda əlindəki qumbaranı sinəsinə sıxaraq özünü tankın altına atır. Zirehli texnikanın heyətini məhv edən vətənimizin cəsur oğlu əbədiyyətə qovuşur.


Namiq Vahid oğlu Abdullayev 1994-cü ildə Azərbaycanın Milli Qəhrəmanı adına layiq görülüb.

ARAN-ı sosial şəbəkələrdə izləyin:

Şərhlər