23.3 C
Aghjabadi
Çərşənbə axşamı, May 24, 2022

“Şuşaya getmək mənə yuxu kimi gəlirdi”

SƏMAYƏ ALLAHVERDİYEVA: “ŞUŞA SİZİN İDİSƏ, NİYƏ O GÜNDƏ SAXLAYIRDINIZ?”

Səmayə Allahverdiyeva Ağcabədi Rayon Mərkəzi Xəstəxanasında Laboratoriya şöbəsinin müdiridir. 2021-ci ilin mayında Şuşada keçirilən “Xarıbülbül” festivalında iştirak edib. Necə? Bax bunu söhbətimiz zamanı biləcəksiniz.

– Səmayə xanım, gəlin lap əvvəldən başlayaq. “Xarıbülbül” festivalına niyə başqa rayon yox, məhz Ağcabədidəki xəstəxanadan nümayəndə göndərildi?

– Düzünü deyim, mən də bilmirəm. Amma belə baxsaq, bizim laboratoriyanın nüfuzu var. Respublika üzrə 4-cü səviyyəli laboratoriyadır. Hər halda, bu da nəzərə alınıb.

– Orada işiniz nədən ibarət idi?

– Yaxma analizi götürürdük.

– Bəs bu analizlər çox zaman almırdı?

– Xeyr. Biz yaxmaları kart – test üsulu ilə götürüb yoxlayırdıq. Bu, tez başa gəlir. Əgər testin cavabı pozitiv çıxardısa, onun üçün artıq tam avtomat aparat var idi. Ən müasir aparatdır. Özümüzlə aparıb Şuşada qurmuşduq ki, cavabı pozitiv çıxanları yenidən PZR üsulu ilə analiz edək.

– Şuşaya getməyiniz haqqında məlumat alanda nə hisslər keçirdiniz?

– Onu təsvir etmək mümkündürmü? Heç cür ifadə edə bilmərəm. Əslində, əvvəl hara gedəcəyimizi deməmişdilər. Eləcə şəxsiyyət vəsiqələrimizi istədilər. Düşündüm ki, yəqin Şəkiyə-filana gedəcəyik. Axşam saat 8-də dedilər ki, Şuşaya gedirsiniz. İlahi, o an… Necə danışmaq olar ki, o hissləri? İndi də yadıma düşəndə göz yaşımı saxlaya bilmirəm.

– Əvvəllər Şuşanı görmüşdünüz?

– Uşaq vaxtı getmişəm. Heç yadıma da düşmür.

– Yol gedərkən “Doğrudanmı Şuşaya gedirəm” deyə bir duyğu yaşadınızmı?

– Əlbəttə… Eynən… Elə bilirdim, yuxudur. Qəribə hisslər idi…

– Neçə tibb işçisi getmişdiniz?

–  Üç nəfər idik.

– Məhz siz gedəndə xəstəxanada qısqanclıqla yanaşan oldumu?

– Ayy, siz nə danışırsınız? Tək bizim xəstəxana yox ey, respublikada kim eşitdisə, qısqanclıqla yanaşdı (gülür).

– Festivalda necə, iştirak etdinizmi?

– Əlbəttə, hamısını izləyirdik. Hə, yadıma düşmüşkən, Masallıdan olan “Nənələr”dən danışım. Onların söhbətlərindən belə çıxdı ki, qrup üzvlərinin əksəriyyəti ağcabədili ilə qudadırlar. Yamanca tərifləyirdilər qohumlarını…

– Məşhurlardan danışmışkən, demək olar, əksər say-seçmə incəsənət nümayəndələri, siyasi xadimlər orada idi. Onlarla ünsiyyət, tanışlıq… Bu haqda hansı təəssüratlarınız var?

– Birinci növbədə sadəliklərini vurğulamaq istərdim. Orada bizim rahatlığımız, qaldığımız yerdəki şərait… Hər şeylə saatbasaat maraqlanırdılar. İncəsənət nümayəndələri də eləcə… Çox sadə idilər.

– Yəqin ki, avtoqraflar, birgə şəkillər oldu onlarla?

– Bilirsiniz, mənim yaşım da o yaş deyil axı, əlimdə telefon onların ardıyca gedim ki, gəl şəkil çəkdirək. Amma məşhurların özlərindən bizə yaxınlaşanlar oldu. Məsələn, dəyərli sənətkarımız Flora xanım özü bizə təklif etdi ki, gəlin şəkil çəkdirək. Yaxud, Mənsum İbrahimov dedi ki, burada çox əziyyət çəkmisiniz. Sizinlə şəkil çəkdirək, xatirə qalsın.

– Festivalda ən çox yadda qalan nə oldu sizin üçün?

– Ümumilikdə çox gözəl idi. O anları yaşamaq bir xoşbəxtlikdir. Mənə ən təsir edən məqam Prezidentin kövrəlib ağlamağı oldu. Biz elə yerdə əyləşmişdik ki, onu qarşıdan görürdük. Prezident ağlayanda məni də ağlamaq tutdu. Bir bloger var idi. Bunu ötürmədi. Nə qədər etdimsə, kadrı silmək istəmirdi ki, bu anı güclə tutmuşam. Dedim anam görsə, danlayacaq ki, hər yerdə ağlayırsan, ondan sonra sildi…

Festivalın birinci günündə ölkəmizdə yaşayan ayrı-ayrı xalqların yaradıcılıq qruplarının çıxışları da çox yadda qalan oldu. Bildiyimiz kimi, Vətən müharibəsində bu xalqların nümayəndələri fədakarlıq göstərdilər, torpaqlarımızın azadlığı uğrunda sinələrini sipər etdilər. Onların festivaldakı çıxışlarını izlədikcə insanın qəlbi riqqətə gəlirdi. Bu, bir birlik, güc, böyüklük mesajı idi. Cənab Prezident çıxışında da həmin mövzunu xüsusilə vurğuladı.

– Şuşada daha hara getdiniz?

– Gövhər ağa məscidinə, çörək sexinə getdik. Həqiqətən də dadlı çörək bişirilir orada. Sizə bir şey deyim, biz Şuşaya Türkiyə Prezidenti Rəcəb Tayyib Ərdoğan gələndə də getmişdik. Orada da bütün rəqqasların, ictimai xadimlərin yaxmasını götürdük. Sülhməramlılar artıq bizi tanıyırdılar. İkinci dəfə Şuşadan qayıdanda soruşdular ki, həkim, necə gedib-gəldiniz? Dedim əla!

– Şuşada yəqin ki, dağılmış, uçmuş, köhnə binaları da gördünüz. Necə təsir etdi sizə?

– Çox pis. Bu bədbəxtlər necə pinti millət imiş. Bax, deyirdilər ki, Şuşa guya onlarındır. Yaxşı, sual vermək lazımdır ki, Şuşa sizin idisə, niyə o gündə saxlayırdınız? İnanırsınız, hər yeri zibilxanaya döndəriblər. Orada təmizliyə baxanlar deyirdilər ki, neçə aydır yığıb-yığışdırırıq, bunların zibili qurtarmır ki, qurtarmır.

– Sonda özünüz nə demək istərdiniz?

– Nə deyim? Şükür bu günə… Bizə yuxu kimi görünənlərin bu gün hamısını real olaraq yaşadıq. Allahdan Ali Baş Komandanımıza uzun ömür arzulayıram. Torpaqlarımızın azadlığı uğrunda canından keçən şəhidlərimizin ruhu qarşısında baş əyirəm. Qazilərimizə və digər döyüşçülərimizə sağlıq diləyirəm. Onların sayəsində biz bu günləri gördük.

Söhbətləşdi: Məhsəti MUSA

                                                             “525-ci qəzet”      

Xəbər lenti

Azərbaycan-Litva münasibətləri yüksələn xətlə inkişaf edir

     Tarixin hansı mərhələsində olursa-olsun, dünyanın siyasi xəritəsində meydana çıxan yeni müstəqil dövlət ayaq üstə qalmaq üçün bir-birindən çətin sınaqlarla üz-üzə gəlir....

Ümumrayon yığıncağı keçirilib

May ayının 21-də Ağcabədi rayon Mədəniyyət Mərkəzində bölgə  ərazisində ideoloji maarifləndirmə işini həyata keçirən təbliğat qrupu üzvlərinin iştirakı ilə ümumrayon yığıncağı keçirilib.

Bu gün onların peşə bayramıdır

Mayın 23-ü Ekologiya və Təbii Sərvətlər Nazirliyi işçilərinin peşə bayramıdır.  Bu münasibətlə 9 saylı Regional Ekologiya və Təbii Sərvətlər İdarəsinin əməkdaşları ulu...

“Fədakarlar bir amalın uğrunda” kitabının təqdimatı keçirilib

Mayın 21-də Nizami Kino Mərkəzində Mədəniyyət Nazirliyi tabeliyində Mədəniyyət üzrə Elmi-Metodiki və İxtisasartırma Mərkəzinin sektor müdiri,  Azərbaycan Jurnalistlər Birliyinin üzvü Aydın Tağıyevin...

Azərbaycan sülhə, təhlükəsizliyə və sabitliyə sadiqdir

Azərbaycan Respublikasının Prezidenti İlham Əliyevmayın 18-də Litva Prezidenti Gitanas Nausadının ölkəmizə səfəri ilə əlaqədar mətbat üçün bəyanat verib.  Ölkə Prezidenti bildirib...

“Çempionumuz” layihəsi çərçivəsində növbəti görüş

Azərbaycan Respublikasının Gənclər və İdman Nazirliyi, Azərbaycan Respublikasının Təhsil Nazirliyi və Azərbaycan İdman Könüllüləri İctimai Birliyi tərəfindən təsdiq edilmiş birgə əsasnaməyə müvafiq...

Deyimlərimiz, kəlamlarımız

         Bədii yaradıcılıq xalqımızın ruhunda, canındadır. Lap qədimdən bu günə qədər qaynayıb-daşan, axıb-coşan bu yaradıcılıq çeşməsi bitib-tükənmək bilmir. Zəngin məna çalarlarına malik...

Avşar elinin tarixi

         Fəzlullah Rəşidəddin (“Cəmiəttəvarix”), Yazıçıoğlu Əli (“Səlcuqnamə”) və Əbülqazi Bahadır Xan Xivəliyə (“Şəcəreitərakimə”) görə Avşar adının anlamı “işlərini cəld görən və ova...

Kümçülərə 877 qutu barama qurdu paylanılıb

         Respublikamızda barama istehsalına yüksək dövlət diqqət və qayğısından ruhlanan rayon kümçüləri 2022-ci təsərrüfat ilində  də bu mühüm kampaniyaya böyük həvəslə qoşulublar.

Şəhidlərin xatirəsi əbədiləşdirilib

         Rayonun İmamqulubəyli kəndində Birinci Qarabağ müharibəsi şəhidləri Hidayət Kərimov, Cavanşir Zeynalov, Savalan Kərimov, Yadigar Bəşirov və Röyal Baxşəliyevin xatirələrini əbədiləşdirmək məqsədi...

Şərhlər