Xalqımızın parlaq tarixi qələbəsi

            Milli Ordumuzun 2020-ci ilin sentyabr ayının 27-də Ermənistan silahlı qüvvələrinə qarşı müharibədə əldə etdiyi qələbə Azərbaycan hərb tarixinə qızıl hərflərlə həkk olunub. Bu möhtəşəm tarixi qələbə xalqımızın qürur və ixtixar mənbəyinə çevrilib.

            Vətən müharibəsində əldə olunmuş bu misilsiz qələbə Azərbaycan Respublikasının Prezidenti, Ali Baş Komandan İlham Əliyevin rəhbərliyi altında ölkəmizdə həyata keçirilən uğurlu güclü dövlət, güclü ordu siyasəti, milli birlik, əsgər və zabitlərimizin döyüş əzmi, qəhrəmanlığı sayəsində mümkün olub. Qazanılmış hərbi nailiyyət eyni zamanda xalqla dövlətin möhkəm birliyinin parlaq təcəssüm etdirib.

            44 günlük müharibədə Azərbaycan dünya hərb tarixində yenilik kimi qəbul edilən döyüş strategiyası və taktikası, ən müasir silahlardan bacarıqla istifadə etmək qabiliyyəti nümayiş etdirib. Həmin mühüm üstünlüklər nəticəsində silahlı qüvvələrimiz döyüşlərdə sürətlə irəliləməyə nail olub, erməni faşistləri tərəfindən işğal olunmuş Qarabağ torpaqları azad olunub, mənfur düşmənin bütün hərbi texnikası darmadağın edilib, canlı qüvvəsi böyük tələfata məruz qoyulub. Beləliklə, müxtəlif beynəlxalq təşkilatların 30 il ərzində edə bilmədiklərini müzəffər Milli Ordumuz Prezident ilham Əliyevin komandanlığı altında qısa müddət ərzində gerçəkləşdirib.

            Aparılmış cəsarətli əks-əməliyyatlar nəticəsində ordusu iflic vəziyyətə düşən Ermənistan müharibəni rüsvayçılıqla uduzub. Bu səbəbdən Ermənistan ordusunun “məğlubedilməzliyi” mifi birdəfəlik alt-üst edilib. Qəhrəman silahlı qüvvələrimiz düşmənin 30 ildə qurduğu istehkamları tarmar edib, böyük bir zəfərə imza atıb.

            Bəli, böyük, parlaq qələbəmizlə müqəddəs yurd yerlərimizin xilasına yol açılıb, torpaqlarımız yadellilərdən təmizlənib. Qısa bir zaman kəsiyində müzəffər Ordumuz tərəfindən Füzuli, Cəbrayıl, Qubadlı, Zəngilan, Xocavənd, Hadrut, Qarabağın ürəyi sayılan Şuşa şəhəri düşmən tapdağından xilas olunub. Ermənilərin ağ bayraq qaldırmaq, kapitulasiya aktına imza atmaqdan başqa çarəsi qalmayıb. Sonrakı günlərdə Laçın, Kəlbəcər və Ağdam da öz azadlığına qovuşub. Tamamilə dağılmış həmin ərazilərdə erməni vandalizminin, barbarlığının əsil mahiyyəti üzə çıxıb. 44 günlük Vətən müharibəsi dövründə bütün dünya Azərbaycan xalqının əzminə, Milli Ordumuzun döyüş qabiliyyətinə şahidlik edib. Vətənpərvər xalqımız öz Prezidentinin ətrafında sıx birliyini bir daha nümayiş etdirib, əsgər və zabitlərimiz öz sözlərinin sahibi olduqlarını təsdiq ediblər. Həmin ağır günlərdə qardaş Türkiyə Respublikası və Pakistan daim xalqımızın yanında olub, böyük dəstək, həmrəylik sərgiləyib.

            Əlbəttə, ilk növbədə bu möhtəşəm qələbəyə görə canlarından, qanlarından keçmiş şəhidlərimizə çox borcluyuq. Onların müqəddəs ruhları qarşısında baş əyirik. Vətən, xalq yolunda sağlamlıqlarını itirmiş qazilərimizə minnətdarlığımızı bildirir, cansağlığı arzulayırıq.

            Diqqətəlayiq haldır ki, İkinci Qarabağ savaşında qələbənin təmin edilməsində respublikamızın hər yerində olduğu kimi rayonumuzun igid oğullarının da xüsusi payı var. Bu gün onların hər biri ilə fəxr edir, qürur duyuruq.            

  Yəhya PAŞAZADƏ

ARAN-ı sosial şəbəkələrdə izləyin:

Şərhlər