“Rabitəbank” “Özünüməşğulluq Layihəsi” çərçivəsində şəhid atasını fərdi sahibkarlıqla məşğul olmaq üçün lazım olan avadanlıqlarla təmin edib.

Aprelin 22-də “Rabitəbank” əməkdaşları “Özünüməşğulluq Layihəsi” ilə bağlı siyahıda olan Ağcabədi rayon sakini, şəhid atası Həziyev Feyruz Namət oğlu ilə görüşüb. Monitorinq zamanı Həziyev Feyruz Namət oğlunun “Döşəmə və Parket cilalanması xidməti üzrə” avadanlıqlara və ləvazimatlara ehtiyacı olduğu aşkarlanaraq həmin avadanlıqlarla təmin edilmişdir.

Özünüməşğulluq layihəsi Əmək və Əhalinin Sosial Müdafiəsi Nazirliyi, Mərkəzi Bank və Azərbaycan Banklar Assosiasiyası arasında imzalanan memoranduma əsasən həyata keçirilir.

Qeyd edək ki, şəhid Həziyev Xəyal Feyruz oğlu 2020-ci il oktyabrın 15-də Füzuli istiqamətində gedən döyüşlərdə könüllü olaraq iştirak edərək şəhid olub. Vətən uğrunda canından keçən şəhidlərimizi hörmətlə anır, şəhid ailələrinin qarşısında baş əyirik.

“Rabitəbank” bundan sonra da “Özünüməşğulluq Layihəsi” çərçivəsində daxil olan müraciətlərə əsasən vətəndaşlar üçün əvəzsiz olaraq müasir standartlara cavab verən avadanlıqların təmin olunmasında dəstək göstərəcəyini vurğulayıb.

“Rabitəbank” ASC Azərbaycanın 16 regionu və Bakı şəhərində 27 xidmət məntəqəsi və 74 ATM-i, “Rabita Mobile” tətbiqi, İnternet Bankçılıq platforması və “RabitaBot” çatbotu, 133 nömrəli Çağrı mərkəzi ilə müştərilərin xidmətindədir.