2022-ci ilin cənab Prezident  tərəfindən “Şuşa  ili” elan edilməsi Şuşanın həm mədəniyyət beşiyi kimi tanıdılmasına, həm də işğaldan azad edilmiş ərazi kimi orada həyata keçirilən bərpa və quruculuq işlərinin sürətləndirilməsinə böyük təkan verdi.

            İşğaldan sonra Şuşada ardıcıl olaraq keçirilən tədbirlərin sırasına nəzər salsaq görərik ki, Şuşa onlarla  mötəbər tədbirə ev sahibliyi edib.

            Bunların içərisində  may ayının 12-də başlayan işğaldan sonra  ikinci dəfə Şuşada keçirilən “Xarıbülbül” Beynəlxalq Folklor festivalı xüsusi önəm daşıyır.

            Şuşanın rəmzi olan xarıbülbül gülünün adını daşıyan bu  festivalının Şuşada keçirilməsinin həm siyasi, həm  mənəvi, həm də mədəni əhəmiyyəti vardır. Əvvala, fesivalın burada keçirilməsi Şuşanın tarixi və mədəniyyət mərkəzi kimi oynadığı rolun təbliği, xalqımızın adət-ənənələrini, milli dəyərlərinin beynəlxalq aləmə çatdırılması, həm də 30 ilə yaxın işğal altında qalan ərazinin Erməni tapdağından azad edildikdən sonra necə böyük bir sürətlə dirçəldilməsinin dünya birliyinə nümayiş etdirilməsi baxımından böyük əhəmiyyəti vardır.

            Azərbaycan multikultural, tolerant, çoxmillətli, çoxkonfensiyalı bir ölkə olduğuna, burada  çoxlu sayda  azsaylı xalqlar yaşadığına,  onların  folklor kollektivlərinin  də festivalda iştirak etməsini görən qonaqlar bir daha şahid oldular ki, məhz  fərqli millətin, xalqın nümayəndəsi olsalar da Azərbaycanda hamıya bir gözlə baxılır. Deməli, Qarabağın müəyyən ərazilərində məskunlaşmış ermənilər öz ambisiyalarından əl çəksələr, azərbaycan vətəndaşı kimi onlara da eyni münasibət göstəriləcəkdir. Məhz bu birliyin nəticəsidir ki, Azərbaycanda  yaşayan bütün xalqlar Vətən müharibəsində yumruq kimi birləşərək Erməni faşizmini məğlub etməyə nail oldular.

            Dünyada yeni siyasi proseslərin cərəyan etdiyi, yeni çağırışların səsləndiyi, millətçilik meyllərinin beynəlmiləlçilik ənənələrinin üstələməsi fonunda bu cür birliyin əldə edilməsi təbii ki, Ölkə Prezidenti cənab İlham Əliyev tərəfindən həyata keçirilən uğurlu xarici siyasətlə paralel düzgün daxili siyasət konsepsiyasının formalaşdırılmasının, milli azlıqlara hörmət və qayğı ilə yanaşılmasının nəticəsidir.

            Ötən festivaldan fərqli olaraq  bu ilki  Xarıbülbül festivalında Azərbaycanda yaşayan xalqlarla bərabər dünyanın müxtəlif ölkələrindən gəlmiş folklor kollektivlərinin iştirakı  festivala yeni bir çalar qatmışdır.

            Bəli, Azərbaycanın “Mədəniyyət paytaxtı” olan və 2023-cü ildə “Türk dünyasının mədəniyyət paytaxtı” elan edilmiş, ömrünün 270-ci baharını yaşayan  Şuşada çal-çağırlı tədbirlərin ardıcıl və davamlı keçirilməsi “Şuşa ili” çərçivəsində hələ çoxlu tədbirlərin tamaşaçısı olacağımıza əminlik yaradır.

            Nazim Bünyatov

            YAP Ağcabədi rayon təşkilatının əməkdaşı