Şuşa haraylı jurnalist

Təranə Muxtarova 25 sentyabr 1955-ci ildə Ağcabədi rayonunda anadan olub. Burada orta məktəbi bitirdikdən sonra 1972-1977-ci illərdə Azərbaycan Dövlət Universitetinin Jurnalistika fakültəsində təhsil alıb.

Əmək fəaliyyətinə 1977-ci ildə təyinatla göndərildiyi “Şuşa” qəzetində müxbir kimi başlayan T. Muxtarova Qarabağ hadisələri başlanarkən ilk etiraz səsini ucaldan jurnalistlərdən olub. 1996-cı ildə “Respublika” qəzetində müxbir vəzifəsində çalışıb. Həssas,vətəni canı qədər sevən Təranə xanım torpaqlarımızın işğalını heç cür qəbul edə bilmirdi və bu, onun səhhətinə də ciddi zərbə vururdu. Şuşa həsrəti, Şuşa nisgili onu günbəgün daha çox üzürdü. İstedadlı jurnalist təsəllini qələmə sarılmaqda tapır. 1996-cı ildə onun “Şuşa harayı” adlı kitabı işıq üzü görür. Kitabın respublika səviyyəsində geniş təqdimatı keçirilir.

Lakin müharibənin sarsıntıları Təranə xanıma daha çox fəaliyyət göstərməyə, bu həqiqətləri daha çox açıb göstərməyəimkan imkan vermir. Getdikcə əsəbləri pozulan həssas qəlbli, gözəl qələm sahibi  2007-ci ildə  52 yaşında dünyasını dəyişir. Şuşanın azad olunmasını görmək ona qismət olmasa da, inanırıq ki, bir vaxtlar Şuşa harayını  dünyaya çatdırmaq istəyən dəyərli jurnalistimizin ruhu indi şaddır.

Qeyd edim ki, Təranə Muxtarova 1989-cu ildə layiq görüldüyü Həsən bəy Zərdabi adına mükafatın ilk laureatlarından biri idi. 1996-cı ildə isə Xan qızı Natəvan adına mükafata layiq görülmüşdü.

Növbəti saylarımızdan birində Təranə xanım haqqında daha geniş yazımız olacaqdır. Lakin istədik ki, “Həmidə” qadınlar klubunda  Ağcabədimizin tanınmış qadınları ilə bağlı qısa yazıların verilməsi ənənəsinə sadiq qalaraq həmyerlimizlə bağlı ilk olaraq kiçik məlumat verək.                                                        

 Məhsəti Musa

ARAN-ı sosial şəbəkələrdə izləyin:

Əvvəlki məqaləGünümüzdə qadınlar
Növbəti məqalədəBir çox qadınlar adından

Şərhlər