18 yanvar 2023-cü il tarixində Ağcabədi Rayon İcra Hakimiyyətinin təşkilatçılığı ilə rayon tarix-diyarşünaslıq muzeyinin inzibati binasında “20 Yanvar həqiqətlərinin dünya ictimaiyyətinə çatdırılmasında Ümummilli Lider Heydər Əliyevin rolu” mövzusunda dəyirmi masa keçirilib. Görüşdə rayon icra hakimiyyətinin, Dini Qurumlarla İş üzrə Dövlət Komitəsinin Ağcabədi bölgəsinin, ADPU-nun Ağcabədi filialının, pedaqoji kollecin, peşə məktəbinin, tarix-diyarşünaslıq muzeyinin, təhsil müəssisələrinin əməkdaşları, Qarabağ müharibəsi veteranları, tələbələr və mətbuat nümayəndələri iştirak edib.
Tədbir Azərbaycan Respublikasının Dövlət Himninin səslənməsi ilə başlayıb. Sonra anım iştirakçıları tərəfindən Ulu Öndər Heydər Əliyevin və 20 Yanvar şəhidlərinin timsalında bütün şəhidlərimizin ruhu bir dəqiqəlik sükutla yad olunub.
Açılış nitqi ilə çıxış edən Ağcabədi RİHB-nın İctimai-siyasi və humanitar məsələlər şöbəsinin baş məsləhətçisi Sevinc Niftalıyeva əvvəlcə qonaqları salamlayıb. S. Niftalıyeva ulu öndərin hakimiyyətə gəlişi ilə ölkəmizdə yaranan siyasi sabitlik barəsində iştirakçılara ətraflı məlumat verib.
Sonra ADPU-nun Ağcabədi filialının kafedra müdiri Tahir Kərimli , Qanlı Yanvar hadisəsi ilə bağlı geniş məruzə ilə çıxış edib. 2023-cü ilin ulu öndər Heydər Əliyevin ili olduğunu vurğulayan natiq dahi rəhbərin hələ sovetlər dönəmində yüksək vəzifədə işlədiyi vaxtlarda da xalqına olan diqqət və qayğının heç zaman azalmadığını qonaqların diqqətinə çatdırıb. T.Kərimli qeyd edib ki, düşmənlərimiz Heydər Əliyev şəxsiyyətindən çəkinərək, hər zaman öz yerlərini biliblər. O, bildirib ki, ölkəmizdə bu tədbirin hər il qeyd olunması xalqımızın azadlıq və müstəqillik mübarizəsi yolunda sovet imperiyasının törətdiyi cinayətləri bir daha xatırlatmaq və ulu öndərin bu cinayətləri dünya ictimaiyyətinə çatdırılmasındakı xidmətlərinə diqqəti yönləndirmək məqsədi daşıyır. T.Kərimli onu da vurğulayıb ki, 19-20-nə keçən gecə həmin qanlı faciədə azadlıq uğrunda çoxlu sayda şəhidlər verməyimizə baxmayaraq, düşmən mübarizə əzmini qıra bilmədi, milli ruhumuzu boğa bilmədi. Həmin dövrdə Heydər Əliyev bu hadisəyə hüquqi, siyasi qiymət verilməsində, dünya ictimaiyyətinə çatdırılmasında öz cəsarətli addımını atdı. Nəticədə dünya ölkələrində cinayətkarların kimliyi bəlli oldu.
Tədbirdə çıxış edən Dini Qurumlarla İş üzrə Dövlət Komitəsinin Ağcabədi bölgəsi üzrə sədri Əlizadə Nəcəfov tarixi aspektdən yanaşaraq, XX əsrdə xalqımızın başına gələn müsibətləri, o cümlədən 20 Yanvar günü baş verən faciəli hadisəni və dahi liderimizin bu istiqamətdə gördüyü işlər barədə anım iştirakçılarının diqqətinə çatdırıb. Əlizadə Nəcəfov bu tədbirin təşkilinə görə öz təşəkkürünü bildirərək, qeyd edib ki, bizim milli-mənəvi dəyərlərimiz və anım günləri sırasında öz yeri olan 20 Yanvar hadisəsi tarixi mübarizəmizin böyük səhifəsidir.
Çıxış edənlər Ağcabədi Pedaqoji Kollecin şöbə müdiri, 2-ci Vətən müharibəsi veteranı Fuad İbrahimov, şəhər 6 saylı tam orta məktəbin direktoru Nərminə Əkbərova, rayonun Hacıbədəlli kənd tam orta məktəbinin direktoru Feyzulla Feyzullayev hüzn günümüz olan- 20 Yanvar hadisəsi və unudulmaz rəhbər Heydər Əliyevin bu faciənin tanınmasında gördüyü işlər ilə bağlı öz fikir və xatirələrini bölüşüblər.
Hüseyn Quluzadə
